صدقات سے مال گھٹتا نہیں بلکہ بڑھتا ہے

حضرت ابوہریرہ رضی اللہ تعالی عنہ رسول اللہ صلی اللہ علیہ وسلم سے روایت کرتے ہیں کہ آقا صلی اللہ علیہ وسلم نے ارشاد فرمایا ایک آدمی جنگل میں جا رہا تھا اس نے بادل سے ایک آواز سنی جیسے کوئی کہہ رہا ہے کہ چاکر فلاں شخص کے باغ کو سیراب کردو وہ بادل ایک طرف چلا پھر وہاں پتھریلی زمین پر برسا ایک نالی نے وہ سب پانی جمع کیا وہ آدمی اس پانی کے پیچھے پیچھے ہولیا آگے چل کر اس نے دیکھا کہ ایک آدمی اپنے باغ کو سیراب کرنے کیلئے بیلچہ سے نالی کو درست کر رہا ہے اس کے درست کرنے کے ساتھ ہی بارش کا یہ پانی وہاں پہنچ گیا یہ شخص اللہ تعالی کی قدرت پر بہت حیران ہوا اور باغ والے سے پوچھنے لگا اللہ کے بندے تمہارا نام کیا ہے اس نے وہی نام بتایا جو اس نے بادل سے سنا تھا اب باغ والے نے اس شخص سے پوچھا اے اللہ کے بندے تم میرا نام کیوں پوچھتے ہو وہ کہنے لگا کہ میں نے اس بادل سے جس کے پانی سے تو اپنا باغ سیراب کررہا ہے یہ آواز سنی تھی کہ فلاں شخص کے باغ کو سیراب کر دو اس میں تیرا ہی نام لیا گیا تھا اب تم یہ بتاؤ کہ تمہارا وہ کونسا عمل ہے جس کی وجہ سے اللہ تم پر اتنا مہربان ہے باغ والا کہنے لگا اب جب کہ تم نے یہ بات سنی لی ہے تو میں تمھیں بتا دیتا ہوں اس باغ سے جو پیداوار ہوتی ہے اس کا ایک تہائی حصہ میں صدقہ کر دیتا ہوں ایک تہائی حصہ میں اور میرے اہل و عیال کھاتے ہیں اور ایک تہائی اس باغ میں لوٹا دیتا ہوں ( یعنی اگلی فصل کے خرچ اخراجات پر صرف کر دیتا ہوں) مسلم شریف